Azərbaycan Respublikası	Müəllif Hüquqları Agentliyi

Kollektiv idarəetmə sahəsində ən yaxşı təcrübə və müəllif cəmiyyətlərinin fəaliyyətinə dövlət nəzarəti


2013-cü il 27-28 noyabr tarixlərində Budapeşt şəhərində Beynəlxalq Müəlliflər və Bəstəkarlar Cəmiyyətləri Konfederasiyasının (CİSAC) Mərkəzi və Şərqi Avropa ölkələri Bölməsi (BİEM) tərəfindən region ölkələrinin müəllif cəmiyyətləri üçün növbəti illik seminar keçirilmişdir (CİSAC 1926-cı ildə yaradılmışdır. Mənzil-qərargahı Paris şəhərində yerləşir. Hazırda CİSAC-da 121 ölkəni təmsil edən 229 müəllif cəmiyyəti birləşmişdir. Bu cəmiyyətlər musiqi, ədəbi, audiovizual, qrafik və tətbiqi incənət əsərləri yaradan 2,5 milyon nəfərdən çox müəllifin maraqlarını təmsil edirlər). 

Kollektiv idarəetmə sahəsində ən yaxşı təcrübənin öyrənilməsinə və kollektiv idarəetmə təşkilatları ilə nəzarətedici orqanlar arasında əlaqələrin inkişafı mövzusuna həsr edilmiş sayca 10-cu illik seminarda müəllif-hüquq sahəsində dövlət siyasətini həyata keçirən Azərbaycan Respublikası Müəllif Hüquqları Agentliyinin Əsərlərin qeydiyyatı və hüquq şöbəsinin müdiri Xudayət Həsənli və “Azərbaycan Müəllifləri” İctimai Birliyinin sədri İsmayıl Məmmədkərimov iştirak etmişlər. Agentliyin nümayəndəsi Azərbaycanda kollektiv idarəetmə təşkilatlarının tarixi, müəllif-hüquq subyekti kimi onların fəaliyyətinə dövlət nəzarətinin formaları, hüquqi əsasları və prinsipləri barədə məlumat vermişdir. Seminarda məruzə ilə çıxış edən əqli mülkiyyət üzrə tanınmış beynəlxalq ekspert Mixail Fisçor (o, Macarıstanı təmsil edir) rəqəmsal şəbəkədə hüquqların idarəçiliyi üzrə Azərbaycan Müəllif Hüquqları Agentliyinin tabeliyindəki Əqli Mülkiyyət Hüquqlarının Təminatı Mərkəzində yaradılmış sistemi yeni nümunə kimi qeyd etmişdir. 
Seminarda müəlliflik hüququ və əlaqəli hüquqların kollektiv əsasda idarəçiliyi üzrə Avropa İttifaqının yeni Direktiv layihəsi ətrafında geniş fikir mübadiləsi aparılmışdır. Müzakirələrdə müəllif cəmiyyətləri tərəfindən qonorarların yığılması, bölüşdürülməsi və hüquq sahiblərinə çatdırılması, həmçinin tariflərin müəyyənləşdirilməsi və əsərlərdən istifadəyə görə lisenziyaların verilməsində yaxın vaxtlarda qəbul ediləcək həmin Direktivin xüsusi rol oynayacağı vurğulanmışdır. 
Müəlliflərin əmlak hüquqlarının kollektiv idarəçiliyi sahəsində ən yaxşı təcrübənin öyrənilməsi, kollektiv idarəetmə təşkilatlarına dövlət nəzarətinin hüquqi əsaslarının gücləndirilməsi, müəllif cəmiyyətlərinin fəaliyyətində antiinhisar qanunvericiliyinin tətbiqi və digər məsələlər barədə də geniş fikir mübadiləsi aparılmışdır.









Onlayn Konsultasiya -

Onlayn Konsultasiya

?